لما صورتي تحوم في ذهنك /الشاعر المبدع عصام السعدني

لما صورتي تحوم في ذهنك 

أوعي تفتكري العيوب...

أوعي تنسي إني في حياتك 

عاصي مليان بالذنوب...

نفسه علي إيدك يتوب...

نفسه يطهر من آفاته...

واللي فاته من حياته...

يزهد الناس إللي عايشه واللي ماتوا...

يعتزل وجع القلوب ...

حاجه هشه أقوي مني أي قشه...

ده إللي فاضل من كياني..

وماهما من بعدك بعاني...

لسه تاني... عند وعدي...

مانتي روحي وإنتي سعدي...

عمري مااقتل فيكي فرحه...

ومش هيطفي غيابي نورك...

مش هيمحي ضياء حضورك...

انشغالي ولا بعدي...

قلبي بيقدم أسف .. 

إنه كان سبب العذاب...

بس قلبك لو عرف...

إنه ياما فيكي داب...

وإن حبه مش سراب... 

إنه كان في الصخر ينحت...

يلقي أعذار للغياب... 

مش عشان فكر يغيب...

إنه يبقي مش حبيب...

ولا يفتح للغياب ميت ألف باب.

ده إنتي حتي لو سألتي عن سبب... 

مش هتلقي إني ببعد ... إنما...

قربي ليكي...

حاجه تشبه للسما...

لما يحضنها السحاب.

 عصام السعدني