كفايا ياناس /الشاعر المصري المبدع جمال زكى عينر
( كفايه يا ناس ) :
كفايه يا ناس بقى تعريض
بغير النقطه فوق الضاد
وتهليلكم لحد عبيط
وياجمالك وتسئيف حاد
لا في كلمه ولا موضوع
ومجرورُه يكون مرفوع
وأي كلام وبيهلفط
وتلقاه ع الكتاف مرفوع
ولما نقول ونِتحرَّى
كلام معقول وله فكره
تضيع الكلمه وحروفها
ما يبقى لها ولا ذكرى
رضانا تنول ما دام تدفع
سمعنالك وما بنسمع
وقول هلفط وما يهمكش
هدايا الحب ليك تشفع
ومن ده كتير في كل مكان
منين ما تروح لحد اسوان
ومجلسهم صفوف أولى
وهمه الدفه والربان
يبصولك كإن ما جيتش
وهمه الآر وهمه الإتش
وهمه الحرف والكلمه
وهمه جبال وإنت الرَتش
يا أهل العرض والتعريض
كفايه خلاص بقى زهقنا
دي ثقافتنا بقت في حضيض
تعبنا خلاص نشف ريقنا
دي ثقافتنا بقت في حضيض
تعبنا خلاص نشف ريقنا
جمال زكي عينر
تعليقات
إرسال تعليق